Owen byrjar þrátt fyrir meiðsli

Michael Owen verður líklega í byrjunarliði Englendinga í æfingaleiknum við Ungverja í kvöld, þrátt fyrir að eiga við smávægileg meiðsli að stríða á læri. Leikurinn verður sýndur í beinni útsendingu á Sýn í kvöld klukkan 18:55. Stjórnarformaður Newcastle hefur látið í ljós óánægju sína með meðferðina á framherjanum og gagnrýnir vinnubrögð enska landsliðsins, því hann var ekki látinn vita af meiðslum Owen í gær.

"Ég er mjög vonsvikinn að vera ekki látinn vita af því strax ef leikmaður okkar á við meiðsli að stríða. Við höfum starfað mjög náið með enska knattspyrnusambandinu og höfum sýnt þeim góðan samstarfsvilja, svo þetta þykir okkur dálítið blóðugt," sagði Freddy Shepherd, stjórnarformaður Newcastle í samtali við BBC í dag.