Watford og Leeds mætast í úrslitum

Nú er ljóst að það verða Watford og Leeds United sem leika til úrslita um laust sæti í ensku úrvalsdeildinni næsta haust, eftir að Watford gerði markalaust jafntefli við Crystal Palace í síðari leik liðanna í undanúrslitum í kvöld. Watford vann fyrri leikinn 3-0 á útivelli og því var alltaf á brattann að sækja fyrir lærisveina Ian Dowie í kvöld.

Leikurinn byrjaði fjörlega en gestirnir voru þó aldrei nálægt því að gera síðari leikinn áhugaverðan, því þeir fengu sitt fyrsta alvöru marktækifæri ekki fyrr en um stundarfjórðungur var eftir af leiknum. Segja má að það markverðasta sem gerðist í leiknum hafi verið þegar Aidy Boothroyd þjálfara Watford var vikið af leikvelli eftir að hann lenti í riskingum við Fitz Hall, leikmann Crystal Palace á hliðarlínunni og litlu munaði að allt færi í bál og brand.