Krónubréfaútgáfa þrátt fyrir neikvæða umfjöllun

Þýski ríkisbankinn Rentenbank gaf út krónubréf fyrir 2 milljarða krónur í gær. Útgáfan er til tveggja ára og bera bréfin 9 prósenta vexti. Þetta er fyrsta útgáfa krónubréfa í mars og þriðja útgáfan frá því Fitch breytti horfum á lánshæfismati ríkisins úr stöðugum í neikvæðar.

Hinar tvær útgáfurnar voru í lok febrúar þegar Rabobank gaf út 5 milljarða krónu krónubréf og European Investment Bank gaf út 1,5 milljarða krónu krónubréf.

Samtals hafa verið gefin út krónubréf fyrir rúmlegan 221 milljarð frá því útgáfa slíkra bréfa hófst í fyrra.

Samkvæmt upplýsingum frá Glitni er ljóst að flestir þeir fjárfestar sem keypt hafa krónubréf þar til á miðvikudag hafa tapað á kaupunum þar sem krónan hefur gefið mikið eftir undanfarið. Útgáfan í gær bendir þó til þess að  neikvæð umræða um Ísland hefur ekki komið í veg fyrir að hægt sé að selja krónubréf erlendis.