Guðjón Valur með 13 mörk fyrir Gummersbach

Guðjón Valur Sigurðsson fór á kostum og skoraði 13 mörk fyrir Gummersbach í dag þegar liðið tryggði sig í undanúrslit Evrópukeppni félagsliða (EHF keppninni) í handbolta þrátt fyrir tap gegn spænska liðinu Bidasoa, 30-26. Róbert Gunnarsson lék einnig með Gummersbach í dag og skoraði tvö mörk. Staðan í hálfleik var 12-11 fyrir heimamenn í Bidasoa.

Gummersbach var í góðri stöðu fyrir leikinn í dag en Guðjón Valur, Róbert og félagar unnu fyrri viðureignina með 9 marka mun, 35-26.

Í kvöld og á morgun skýrist það hvaða lið komast í undanúrslitin ásamt Gummersbach.

Í kvöld mætast Göppingen og Gudme og á morgun verða svo tveir síðustu leikirnir í 8 liða úrslitunum.

Lemgo, lið Ásgeirs Arnar Hallgrímssonar og Loga Geirssonar heimsækir Dynamo Astrachan og Creteil tekur á móti Kielce.