Vonar að áhorfendur bauli ekki á Neville

Steven Gerrard fyrirliði Liverpool og leikmaður enska landsliðsins, vonar að áhorfendur á Anfield muni ekki baula á Gary Neville leikmann Manchester United þegar Englendingar taka á móti Úrúgvæ í æfingaleik í kvöld. Neville er ekki vinsælasti maðurinn hjá stuðningsmönnum Liverpool eftir að hann fagnaði marki United fyrir framan þá í leik liðanna um daginn.

"Ég trúi ekki að áhorfendurnir verði erfiðir við hann, því hann er nú einu sinni að spila fyrir hönd Englands," sagði Gerrard. David Beckham sló hinsvegar á létta strengi og benti á að Neville hefði enn ekki þorað að stíga fæti út af hótelinu í Liverpool. Leikur Englands og Úrúgvæ verður sýndur beint á Sýn í kvöld og hefst útsending klukkan 19:55.