Brown ráðleggur Heinze að taka því rólega

Wes Brown, varnarmaður Manchester United, hefur ráðlagt félaga sínum Gabriel Heinze að flýta sér ekki um of að byrja að spila aftur eftir erfið hnémeiðsli. Brown hefur sjálfur mikla reynslu á því sviði, en Heinze hefur sett stefnuna á að vera með liði Argentínu á HM í sumar.

"Það eina sem ég sagði við Gabriel var að flýta sér ekki til baka, heldur hlusta vel á læknana og sjúkraþjálfarana. Menn fá það fljótlega á tilfinninguna að þeir séu klárir í slaginn og vilja bara byrja að spila strax aftur. Það er þó ekki nóg að hafa rétta hugarfarið, því líkaminn verður að fá sinn tíma til að jafna sig og það versta sem menn geta gert er að fara of snemma af stað," sagði Brown á heimasíðu Manchester United.