Alan Smith mun jafna sig

David O´Leary fyrrum stjóri Alan Smith hjá Leeds segir að hann muni komast í gegnum þau skelfilegu meiðsli sem hann hlaut í gær. Smith fer í aðgerð í dag en hann fótbrotnaði í leiknum gegn Liverpool sem United tapaði 1-0.

Smith ætlaði þá að fórna sér fyrir skot John Arne Riise en einhvern veginn náði hann að festa löppina í grasinu. Allur skrokkurinn hélt hins vegar áfram og fór þunginn allur á ökklann, sem síðar kom í ljós að hafði mölbrotnað.

"Hann fótbrotnaði og ökklinn fór úr lið. Þetta eru ein verstu meiðsli sem ég hef séð," sagði Alex Ferguson, stjóri Man. Utd. eftir leikinn. Smith var borinn af velli sárþjáður og tengdur við súrefnisgrímu til að hann héldi meðvitund.

"Það er varla hægt að finna sterkari persónu en hann og hann mun snúa aftur jafnvel betri en áður fyrr. Ég sá endursýningar á atvikinu og þetta leit skelfilega út en vonandi sjáum við hann flótlega aftur enda á hann farsælan feril fyrir höndum sér. Það er alltaf leiðinlegt að sjá menn meiðast svona í íþróttum en það er verra þegar það er einhver sem þú hefur unnið með og líkar mjög vel við," sagði O´Leary í dag.

Smith fer eins og áður sagði í aðgerð í dag en hann gæti verið frá keppni í níu mánuði vegna meiðslanna.