Charlton áfram

Charlton er komið í átta liða úrslit FA bikarkeppninnar eftir 3-1 sigur á 1. deildarliðinu Brentford en Hermann Hreiðarsson lék allan leikinn í hjarta varnarinnar hjá Charlton. Bolton og West Ham þurfa að mætast aftur eftir markalaust jafntefli.

Darren Bent kom Charlton yfir strax á þriðju mínútu þegar hann fékk stungusendingu frá Radostin Kishishev og kláraði færið vel. Jay Bothroyd skoraði svo beint úr aukaspyrnu áður en Bryan Hughes kláraði leikinn fyrir Charlton.Isaiah Rankin minnkaði þó muninn fyrir Brentford sem komust ekki lengra og eru því úr leik.

Bolton og West Ham verða að mætast aftur eftir að leik þeirra lauk með markalausu jafntefli í dag. Bæði lið fengu færi til að tryggja sér sigurinn en allt kom fyrir ekki og markalaust jafntefli niðurstaðan.