Ballack fær engan draumasamning

Forráðamenn Bayern Munchen láta nú í það skína að litlir peningar verði handbærir til að bjóða Michael Ballack risasamning, en núverandi samningur hans rennur út í sumar. Ballack hefur fram að þessu ekki viljað ræða nýjan samning og hefur verið orðaður við lið á Englandi og á Spáni.

Bayern er nú á höttunum eftir þýska landsliðsmanninum Lukas Podolski frá Cologne og Uli Hoeness hefur látið hafa eftir sér að ef hann verði keyptur, verði litlir peningar eftir til að splæsa í risasamning handa fyrirliðanum. Ballack getur enda sjálfum sér um kennt, því forráðamenn Bayern tóku stórt tilboð upp á fjögurra ára samning út af borðinu fyrir nokkru, því leikmaðurinn hafði ekki áhuga.