Alþjóðlegt orðspor og ímynd

Segja má að árið 2006 hafi verið eitt það stormasamasta sem íslenskt viðskiptalíf hefur upplifað fyrr og síðar. Eftir sterkan meðbyr í byrjun árs þar sem hlutabréfavísitölur uxu með áður óþekktum hraða snerust vindar á móti seglum undir lok febrúarmánaðar með aðfinnslum erlendra greiningaraðila á efnahags- og fjármálakerfi landsins. Helstu fjölmiðlar heimsins fylgdu í kjölfarið.

Eitthvað af þeirri gagnrýni sem upp kom í umræddum skýrslum og blaðagreinum átti rétt á sér enda efnahagsaðstæður landsins að ýmsu leyti hinar undarlegustu. Ákveðnir þættir gagnrýninnar voru þó frekar byggðir á vanþekkingu á íslenskum aðstæðum og innviðum íslenskra fjármálafyrirtækja.

Litlu mátti muna að illa færi en segja má að umræðan hafi tekið stakkaskiptum til hins betra í kjölfar útgáfu skýrslu Viðskiptaráðs um fjármálastöðugleika á Íslandi. Þar fjölluðu Tryggvi Þór Herbertsson og Frederic Mishkin um líkindi þess að fjármálakreppa ætti sér stað á Íslandi. Skýrslan var vel kynnt bæði innanlands og utan og í kjölfarið komst nokkurt jafnvægi á alþjóðlega umfjöllun.

Ljóst er að ímynd landsins varð fyrir enn frekari skakkaföllum með illa undirbúinni endurskoðun á fyrirkomulagi hvalveiða. Þar sem hvorki var lagður tími né vinna í að kynna afstöðu og ástæður veiðanna má telja víst að ásýnd landsins hafi beðið hnekki hjá hópi útlendinga. Hversu alvarlegt og afdrifaríkt það reynist er erfitt að meta.

Í því umróti sem átt hefur sér stað hafa komið glögglega í ljós veikleikar þess að sinna ekki nægilega almannatengslum og öflugu upplýsingaflæði. Með vaxandi sýnileika á erlendum viðskiptamörkuðum getur reynst ómetanlegur styrkur fyrir ímynd og áreiðanleika fyrirtækja og þjóða að halda úti virku flæði upplýsinga.

Viðskiptaráð Íslands hefur látið ímynd íslensks viðskiptalífs sig varða og hefur staðið fyrir mikilli vinnu í tengslum við þau mál. Viðskiptaþing 2007 verður helgað alþjóðlegu orðspori og ímynd Íslands. Þegar öllu er á botninn hvolft, þá getum við verið virkilega stolt af þeim brjálaða árangri sem við höfum náð og ef við leggjumst saman á árar þá getum við verið þekkt fyrir miklu áhugaverðari og skemmtilegri hluti en þá sem ratað hafa á síður alþjóðlegra fjölmiðla þetta árið.