SAS hefur ekki keypt í Icelandair

SAS hefur neitað þeirri frétt sem birtist á vefsíðu tímaritsins Travel People að félagið hafi eignast hlut í Icelandair.

"Það eru engar viðræður yfirhöfuð í gangi um að við verðum eigendur í Icelandair. Þetta eru algjörlega rangar upplýsingar," segir Bertil Ternert, upplýsingafulltrúi SAS, við Dagens Industri.

Flugfélögin hafa hins vegar undirritað samkomulag um áframhaldandi samstarf um gagnkvæm afsláttarkjör sem veita farþegum Icelandair hagstæð fargjöld í framhaldsflugi með SAS.

Samkvæmt frétt Travel People kemur Icelandair, sem verður brátt skráð í Kauphöll Íslands, til að vera metið á hvorki meira né minna en 65 milljarða króna.

Í fréttinni kemur fram að FL Group, móðurfélag Icelandair, muni halda eftir fimmtán prósenta hlut.