Chelsea er hrætt við okkur

Rafael Benitez, knattspyrnustjóri Liverpool, segir að Chelsea-liðið sé líklega hrætt við Liverpool og segir að dómarinn hafi sleppt þremur augljósum vítaspyrnum í leik liðanna í Meistaradeildinni á Anfield í gærkvöldi. "Ég er viss um að Chelsea er meinilla við að spila við Liverpool. Þeir tala og tala og tala fyrir leiki við okkur, þannig að kannski eru þeir bara hræddir við okkur. Ég vona að minnsta kosti að það verði niðurstaðan eftir helgina," sagði Benitez. Jose Mourinho hefur látið hafa eftir sér að ef Chelsea vinni leik liðanna í deildinni á sunnudaginn, séu möguleikar Liverpool í toppbaráttunni í vetur úr sögunni, en Benitez horfir öðruvísi á málið. "Við stjórnuðum leiknum í vörn, sókn og á miðju að mínu mati og þó ég vilji ekki vera að væla yfir umdeildum atvikum, held ég að sjáist greinilega í sjónvarpi að við hefðum átt að fá dæmdar vítaspyrnur í þessum leik," sagði Benitez.