Hef séð það svartara

Vanderlei Luxemburgo, knattspyrnustjóri Real Madrid á ekki sjö dagana sæla um þessar mundir enda gengur hvorki né rekur hjá liðinu. Farið er að hitna allverulega undir stólnum hans og margir sem spá því að hann verði látinn fjúka áður en langt um líður. Real tapaði sínum þriðja leik á innan við viku í dag sunnudag en hann efast þó ekki um að liðið nái að rífa sig upp úr sleninu og biður menn að sýna stillingu. "Við erum meðvitaðir um að hlutirnir ganga heldur erfiðlega eins og stendur en við náum okkur. Ég hef seð það svartara en þetta. Við verðum bara að sýna stillingu og taka þessu með jafnaðargeði og leggja enn harðar að okkur." sagði brasilíski þjálfarinn eftir tapleikinn gegn Espanyol á sunnudag þar sem tveir nýjir leikmenn félagsins létu reka sig út af og Real lauk leiknum með 9 leikmenn innanborðs. "Enn og aftur erum við að fá á okkur mark úr föstu leikatriði en nú gerðist nokkuð undarlegt. Leikmennirnir mínir segja að dómarinn hafi flautað áður en boltinn fór yfir línuna. Þegar maður tapar þá er ekki beint rétti tíminn til að byrja að greina í hlutina og útskýra allt. Við ætlum ekki að reyna að búa til einhverjar afsakanir." sagði Luxemburgo en lið hans er í 14. sæti spænsku úrvalsdeildarinnar með 3 stig eftir 3 leiki og steinlá fyrir Lyon, 3-0 í Meistaradeildinni í síðustu viku.