Bent maður mánaðarins

Framherjinn ungi Darren Bent hjá Charlton hefur verið valinn knattspyrnumaður mánaðarins í ensku úrvalsdeildinni, en hann fór mikinn í fyrstu umferðum mótsins. Þá hefur verið tilkynnt að Stuart Pearce, stjóri Manchester City hefur verið valinn knattspyrnustjóri mánaðarins. Bent hefur verið maðurinn á bak við frábæran árangur Charlton í fyrstu leikjum tímabilsins og hefur skorað fjögur mörk í fyrstu þremur leikjum sínum. "Bent er fljótur og marksækinn leikmaður og það er sannarlega gaman að ungur enskur leikmaður skuli hirða þessi verðlaun núna," sagði talsmaður dómnefndarinnar sem stóð að valinu. Þetta var í annað skiptið í röð sem Stuart Pearce fær þessi verðlaun, því hann var kjörinn stjóri mánaðarins í apríl í vor. Síðan hann tók við liði City hefur liðið aðeins tapað einum leik í úrvalsdeildinni og hefur nú ekki tapað í tólf viðureignum sínum í röð.