Charlton gerir tilboð í Rúrik

Enska knattspyrnufélagið Charlton hyggts gera HK tilboð í unglingalandsliðsmanninn Rúrik Gíslason, en Rúrik sem aðeins er 17 ára hefur verið til reynslu hjá Charlton í tvígang á síðustu vikum. Halldór Valdimarsson, formaður knattspyrnudeildar HK, sagði í samtali við íþróttadeildina í morgun að HK hefði ekki fengið formlegt tilboð í Rúrik og málið ekki verið rætt á vettvangi félagsins. Halldór sagði að væntanlega yrði farið yfir málið á fundi í dag, en frestur til félagskipta rennur út á miðvikudag. Rúrik Gíslason var áður á mála hjá Anderlecht í Belgíu en hafði þar skamma dvöl.