Hagvöxtur eykst milli ára

Hagvöxtur var 5,2 prósent í fyrra samkvæmt áætlun Hagstofunnar. Þetta er einu prósentustigi meiri hagvöxtur en árið 2003. Einkaneysla jókst hins vegar um 7,5 prósent og fjárfestingar um tæp 13 prósent sem leiddi til 70 milljarða króna viðskiptahalla. Hagstofan birti í dag Hagtíðindi með áætlun um landsframleiðsluna í fyrra. Samkvæmt þeim var landsframleiðslan 859 milljarðar króna, sem er 5,2 prósentum meira en árið 2003. Þetta er einu prósentustigi meiri hagvöxtur en árið áður, en þá var hann 4,2 prósent. Samanborið við mörg Evrópulönd er þessi hagvöxtur gríðarlegur en þó skyldi ekki ofmeta hann. Arnór Sighvatsson, aðalhagfræðingur Seðlabanka Íslands, segir að hagvöxtur hér á landi hafi jafnan sveiflast talsvert mikið. Samkvæmt nýjustu tölum hafi orðið verulegur samdráttur á árinu 2002, rúm tvö prósent, en á aðeins tveimur árum hafi hann snúist í hagvöxt og það skýrist af hluta til af mikilli fjárfestingu í stóriðju sem muni halda áfram í ár og það næsta. Einkaneysla jókst um 7,5 prósent og fjárfestingar um tæp 13 prósent. Þetta þýðir að þjóðarútgjöld jukust langt um fram landsframleiðsluna sem leiddi til viðskiptahalla upp á tæpa sjötíu milljarða króna, eða 8,1 prósent af landsframleiðslu. Er ástæða til þess að hafa áhyggjur af þessari þróun? Arnór segir að viðskiptahallinn feli það í sér að eitthvað verði að gefa eftir að lokum og hagvöxtur að hægja sér. Það sé sjálfgefið að draga muni úr honum þegar fjárfestingartímabilinu ljúki en hversu mikið það verði sé erfitt að sjá á þessari stundu. Flestum hallatímabilinum hafi lokið einvherjum samdrætti í landsframleiðslu.