Afskrifaði 500 milljónir af 700

Síminn borgaði tæplega 700 milljónir króna fyrir svokallaðar óefnislegar eignir í fyrra en afskrifaði rúmlega 500 þeirra í lok árs. Forstjóri Símans segir þetta ekki þýða að eignirnar hafi verið metnar of hátt. Óefnislegar eignir eru viðskiptavild, sýningarréttur og fleira þess háttar. Síminn fjárfesti mikið í fyrra og voru greiddar tæplega 700 milljónir króna fyrir svokallaðar óefnislegar eignir. Rúmlega hálfur milljarður var svo afskrifaður í lok árs miðað við 36 milljónir árið áður. En hvers vegna að borga 700 hundruð milljónir fyrir eignir sem reynast svo 200 milljóna króna virði? Brynjólfur Bjarnason, forstjóri Símans, segir að þegar eignir séu keyptar sé stundum greitt yfirverð fyrir bókfært verð. Áður fyrr hafi afskriftir farið fram á fimm árum eða á sama ári. Nú sé hins vegar komið fram alþjóðlegur reiknistaðall þar sem fram fari svokölluð virðisrýrnunarpróf. Aðrir endurskoðendur en endurskoðendur fyrirtækisins geri prófið og í þessu tilviki hafi þessar eignir Símans farið í prófið og verið færðar niður í þeim tilgangi að efnahagsreikningurinn sýndi sem besta mynd af eigninni. Eins og fyrr sagði keypti Síminn ýmis félög og hluti í fyrra, þar á meðal Íslenskt sjónvarp ehf. sem á hlut í Íslenska sjónvarpsfélaginu hf. sem á og rekur sjónvarpsstöðina Skjá einn. En er það ekki mótsögn að segja að ekki hafi verið greitt of hátt verð þegar virðisrýrnunarpróf sýna að virðið hafi rýrnað um hálfan milljarð á árinu? Brynjólfur neitar því og bendir á að kaup Símans á fyrirtækjum í fjölmiðlarekstri komi til með að nýtast honum vel í fjarskiptakerfi hans og öðru því um líku. Aðspurður hvaða fyrirtæki hafi þurft að afskrifa mest segir Brynjólfur að um hafi verið að ræða nokkur fyrirtæki og menn verði bara að geta sér til um það. Þá var hann inntur eftir því hvort fjórðungshlutur Símans í Íslenska sjónvarpsfélaginu hefði verið þess virði og Brynjólfur svaraði því til að hann hefði verið það og miklu meira. Það komi í ljós.