Fékk inni­legt knús alla pásuna: „Höldum á­fram þessari hel­vítis vit­leysu“

Sjá mátti Elísu knúsa Þórdísi svo til alla pásuna eftir að hún hafði hlaupið hring númer 22 en Elísa segir engan bilbug á Þórdísi að finna. Hún er ein af þrettán landsliðsmönnum Íslands sem enn hlaupa í Elliðaárdalnum en tveir hafa hætt keppni.

„Ég hlýði henni en það er samt ég sem ræð,“ sagði Elísa létt í bragði þegar hún ræddi við Garp Elísabetarson á meðan hún blandaði kolvetnadrykk til að hafa allt klárt næst þegar Þórdís kæmi að fá aðstoð hjá henni.

„Okkur líður vel. Það var smá ógleði að trufla okkar konu í nótt en hún er komin yfir það og er bara eldspræk. Síðasta sem hún sagði við mig var „höldum áfram þessari helvítis vitleysu“. Hún er bara hress og kát,“ sagði Elísa um Þórdísi.

Eftir hlaup í 22 klukkutíma hlýtur svefnleysi að fara að segja til sín en Elísa segir Þórdísi ná stuttum blundum inn á milli.

„Hún er búin að vera að leggjast á bekkinn. Hún er alltaf að koma inn á mjög góðum tíma og nær að detta út í 4-5 mínútur,“ segir Elísa.

Elísa ákvað sjálf að taka sér hlé frá bakgarðshlaupum og einbeita sér að hefðbundnari utanvegahlaupum en fann fyrir ákveðnum söknuði við að fylgjast með íslenska landsliðsfólkinu:

„Ég hef ekki verið að sakna þess að hlaupa í þessari vitleysu en það er eitthvað núna… Ég var að hlaupa á móti þeim í morgun og auðvitað er þetta lúmskt gaman. Fara ofan í þessa djúpu dali og komast út úr þeim. Eins og Þórdís gerði í nótt með ógleðina. Það er svo geggjað að sigrast á þessu,“ segir Elísa en viðtalið við hana má sjá hér að neðan.

Beina útsendingu og textalýsingu frá hlaupinu má sjá með því að smella hér.