Í stuttri yfirlýsingu peningastefnunefndar í morgun, hún taldi 165 orð en var 211 orð við ákvörðun nefndarinnar í ágúst, kom fram að meginvextir Seðlabankans yrðu áfram átta prósent – þeir höfðu áður verið hækkaðir á síðustu þremur fundum – og vísað til þess að verðbólgan hefði aukist í sumar „eins og búist var við.“
Allir greinendur og hagfræðingar höfðu spáð fyrir um óbreytta vexti og var ákvörðun peningastefnunefndar í þetta sinn stutt af öllum fimm nefndarmönnum hennar. Tólf mánaða verðbólgan mælist núna 5,9 prósent og hefur ekki verið meiri í tvö ár.
„Aukning mældrar verðbólgu hefur fyrst og fremst litast af áhrifum stríðsátaka í Mið-Austurlöndum og hækkun opinberra gjalda. Undirliggjandi verðbólga hefur hins vegar haldist tiltölulega stöðug í liðlega fjögur prósent um nokkra hríð,“ sagði í yfirlýsingu peningastefnunefndar.
Engin Peningamál og ný uppfærð þjóðhagsspá Seðlabankans fylgdi með vaxtaákvörðuninni í þetta sinn, en það verður næst þegar peningastefnunefndin kemur saman í síðasta sinn á árinu þann 18. nóvember næstkomandi.
Fáeinum klukkutímum áður en peningastefnunefndin tilkynnti fyrirsjáanlega um óbreytta vexti, ásamt yfirlýsingu sem var með fremur mildum tón um framhaldið, höfðu borist fréttir af því í gærkvöldi að breiðfylking stéttarfélaga – Starfsgreinasambandið, Efling, Samiðn og Byggiðn – og Samtök atvinnulífsins hefðu náð saman um að koma í veg fyrir að kjarasamningum yrði slitið. Enn er hins vegar óvissa hver verður ákvörðun VR, Fagfélaganna og LÍV.
Skuldabréfafjárfestar brugðust nokkuð vel við tíðindunum þegar Kauphöllin opnaði í morgun og ávöxtunarkrafa óverðtryggðra stuttra ríkisbréfa, eins og RB27, RB28 og RB31, lækkaði nokkuð. Þegar krafa skuldabréfa lækkar þá hækkar verð bréfanna, og svo öfugt. Lítilleg hækkun hefur orðið á sama tíma á ávöxtunarkröfu verðtryggðra ríkisskuldabréfa og því hefur verðbólguálagið – munur á kröfu verðtryggðra og óverðtryggðra ríkisbréfa – lækkað sem því nemur.
Þótt peningastefnunefndin undirstriki það í yfirlýsingu sinni að „greinilega“ sé tekið að hægja á efnahagsumsvifum bendir hún á að mæld og undirliggjandi verðbólga er enn of mikil og verðbólguvæntingar of háar. „Flest bendir þó til þess að verðbólga hjaðni tiltölulega hratt á næsta ári en óvissa er töluverð, ekki síst hvað varðar þróun alþjóðlegra efnahagsmála og framvindu á innlendum vinnumarkaði.“
Þótt greinilega sé tekið að hægja á efnahagsumsvifum er mæld og undirliggjandi verðbólga enn of mikil og verðbólguvæntingar of háar.
Framsýn leiðsögn nefndarinnar í yfirlýsingunni er haldið óbreyttri frá því fundinum í ágúst.
Í ljósi óvissu og þrálátrar verðbólgu og verðbólguvæntinga telur peningastefnunefnd rétt að viðhalda þéttu peningalegu taumhaldi. „Mótun peningastefnunnar mun sem fyrr ráðast af þróun efnahagsumsvifa, verðbólgu og verðbólguvæntinga.“
