Mun Conte taka við Manchester United?

Í viðtali við The Athletic er Conte spurður að því hvað sé næst á döfinni hjá honum. Hann hefur ekki þjálfað síðan hann fór frá Napoli eftir síðasta tímabil þrátt fyrir að hafa endað í öðru sæti ítölsku úrvalsdeildarinnar.

Conte segist hafa mikinn áhuga á því að þjálfa á Englandi því fjármagn félaga þar er mun meira en í öðrum deildum í Evrópu. Það er þó ekki nóg að eiga fullt af peningum heldur þarf að eyða þeim á réttan hátt.

„Það þarf að fara varlega með hvernig peningnum er eytt. Þess vegna er mikilvægt að hafa skýra sýn og vinna markvisst að henni. Það er ekkert mál að eyða pening en þú verður að gera það á viturlegan hátt,“ sagði Conte þegar hann var spurður hvort hann hefði áhuga á að þjálfa aftur á Englandi.

Misjafnt gengi á Englandi

Áður hefur hann þjálfað tvö lið á Englandi en hann eyddi tveimur árum sem þjálfari Chelsea og tveimur árum sem þjálfari Tottenham. Þegar hann var hjá Chelsea vann hann ensku úrvalsdeildina á sínu fyrsta tímabili sem þjálfari liðsins.

Hann náði ekki að endurtaka sama árangur hjá Tottenham en Conte sagði að menningin innan félagsins hefði ekki verið nógu góð. Hann hrósaði PSG og Arsenal fyrir árangurinn sinn og segir hann koma að hluta til vegna þess að félagið treystir framtíðarsýn þjálfarans. Ef hún er góð og það er fjárfest í henni til langs tíma þá er líklegt að það leiði til árangurs.

Manchester United næsti áfangastaður?

Það sem heillar Conte mest er félag með ríka sögu þar sem markmiðið er að koma félaginu aftur á sigurbraut þar sem liðið var áður fyrr. Þrátt fyrir að liðið hafi aldrei verið nefnt í viðtalinu passar lýsing Conte mjög vel við Manchester United en Conte hefur verið orðaður við liðið eftir vonbrigðabyrjun á tímabilinu.

Michael Carrick tók við liðinu á síðasta tímabili og stóð sig það vel að hann fékk áframhaldandi samning. Hann hefur þó ekki náð að halda áfram góðu gengi og miðað við sögu félagsins síðustu ár þá hefur það litla þolinmæði fyrir slæmu gengi þjálfara. Conte segist þrífast undir svoleiðis álagi og virðist vera tilbúinn að taka við sem þjálfari rauðu djöflanna.