Baulað á Luke Littler í Hollandi

BBC Sport greinir frá því að dómari hafi þurft að gera hlé á keppni og sagt áhorfendum að haga sér betur í 8-manna úrslitum þegar Littler vann Nathan Aspinall naumlega. Ástandið átti þó eftir að versna þegar Littler mætti heimamanninum Danny Noppert seinna á mótinu.

Littler hefur áður lent í mótlæti í Þýskalandi og hefur hætt við keppnir þar en mun keppa í Dortmund í næsta mánuði og vonar að áhorfendur hafi bætt sig þar. Ekki er ómögulegt að þetta hafi verið síðasta mót Littlers í Hollandi í langan tíma.

Í viðtali eftir keppnina sagðist Littler ekki sjá tilganginn í því að keppa í Hollandi ef það væri baulað á hann. Vanalega gefur hann eiginhandaráritanir og spjallar við aðdáendur eftir keppni en síðustu kvöldin í Hollandi sleppti hann því og fór beint heim.

Einhverjir undra sig á óvinsældum Luke Littler þar sem hefði hann unnið mótið hefði hann brotið blað í sögu pílukastsins. Hann hefði verið fyrsti leikmaðurinn til þess að vinna alla tíu sjónvarpsviðburði á einu ári. Áhorfendur þurfa því að passa sig á því hvernig þeir haga sér í kringum hann svo hann gangi einfaldlega ekki frá íþróttinni.