„Eins og að horfa á bíó­mynd“

Þegar Millroy lenti í árekstrinum varð mikill eldur í bíl hans og var hann fastur inni í bílnum í meira en mínútu áður en náð var að hjálpa honum úr bílnum. Loek Hartog stoppaði bílinn sinn um leið og hann sá eldinn og byrjaði að reyna að slökkva hann. Þegar tækifæri gafst náði hann að draga Millroy úr brakinu og koma honum í hendur lækna.

Í viðtali við BBC Sport sagðist Millroy vera þakklátur Hartog þar sem hann hefði getað dáið ef hann hefði ekki fengið hjálp.

„Hann brást strax við og gerði allt rétt. Þegar ég horfi til baka á myndbandið af atvikinu er eins og ég sé að horfa á bíómynd þar sem búið er að æfa þetta allt. Hann sá að eldurinn var of mikill til að ná mér úr bílnum svo hann sótti slökkvitæki til að minnka eldinn. Á endanum opnaðist glufa þar sem hann gat lyft mér úr bílnum sem hann nýtti.“

Ollie Millroy kveðst vera þakklátur fyrir að bruninn sem hann fékk hafi ekki verið slæmur og að hann sé á lífi yfirhöfuð hafi verið kraftaverk.

„Ég er ekki trúaður á nokkurn hátt, en það var eins og hann væri forritaður til þess að draga mig úr þessum bíl. Atvikið hefur myndað ákveðin tengsl milli okkar. Ég mundi ekkert eftir árekstrinum en Loek kom á spítalann og sagði mér frá því sem gerðist. Við fórum báðir að hágráta því útkoman hefði getað verið allt önnur.“

Áreksturinn var harður og við hann brákuðust nokkur bein og fékk hann gat á lunga. Hann er búinn að vera á spítala í Kína síðan áreksturinn varð en hann man ekki hvað gerðist allt að klukkutíma eftir áreksturinn.

„Að horfa á myndband af atvikinu er eins og að ég sé að horfa á einhvern annan. Ég talaði við Loek og tók af mér hjálminn vegna þess að mig skorti súrefni, en þetta var ekki ég. Líkaminn var ákveðinn í að lifa af og gerði það sem hann þurfti að gera.“