Ekkert verður af kaupum Heklu á Bílson

Þetta kemur fram í færslu Bjarka Harðarsonar, eiganda Bílson bílaverkstæðisins.

Til stóð að Hekla bílaumboð myndi festa kaup á verkstæðinu en var kaupsamningurinn háður samþykki Samkeppniseftirlitsins. 

„Í kjölfar samrunatilkynningar hóf Samkeppniseftirlitið ítarlega rannsókn á umræddum mörkuðum og áhrifum samrunans sem stendur enn yfir,“ segir Bjarki í færslunni.

„Mat aðila er að rannsókn Samkeppniseftirlitsins beri þess merki að markaðir verði skilgreindir með þrengri hætti en áður hefur verið gert og fyrirsjáanlegt sé að samruninn verði ekki samþykktur, að minnsta kosti ekki án íþyngjandi skilyrða sem breyta forsendum viðskiptanna í grundvallaratriðum.“

Vegna þessa hafi hann óskað eftir því að hætta við fyrirhugaðan samruna og samþykkti Hekla þá ósk. Kaupsamningurinn, sem undirritaður var í desember 2025, er því ógildur að fullu.

Til stendur að halda starfsemi Bílson áfram líkt og áður.