Her­bert kveikti í mynd­verinu í fyrsta þætti

Um skemmti- og fréttaskýringarþátt er að ræða þar sem þáttastjórnandi fer yfir helstu fréttamál og umfjöllunarefni sem brenna á fólki í hverri viku. Fjallað er um stóru málin á léttu nótunum og á mannamáli. Herbert mætir á svæðið eftir um fjórtán mínútur af þættinum.

Þáttastjórnun verður í höndum Tómasar Arnar Þorlákssonar og Elísabetar Ingu Sigurðardóttur sem stefna á að fræða og kæta landsmenn um hin ýmsu mál. Í byrjun hvers þáttar verður stiklað á stóru og farið yfir það kómíska úr fréttum vikunnar. Fyrir miðbik þáttar er klippt innslag þar sem skemmtilegar klippur eru settar saman á nýstárlegan máta.

Í lok hvers þáttar verður farið á dýptina í stórum málum sem setja svip sinn á líðandi stund. Það er gert með það fyrir stafni að útskýra mál sem getur mögulega reynst þvælið að kynna sér. Til að mynda er bókun 35 útskýrð á einfaldan og skemmtilegan máta í fyrsta þættinum. 

Bókunin virðist ætla verða að bitbeini á þinginu í vetur og er hún því tekin fyrir. Með greiningu á bókun 35 eru vonir bundnar við að fólk fái skýra mynd af málinu og geti jafnframt myndað sína eigin skoðun.

Í Hvað er að frétta? má gjarnan vænta þess að eitthvað óvænt eða skemmtilegt komi upp á en til að mynda kom söngvarinn Herbert Guðmundsson óvænt fram í fyrsta þættinum með glæsibrag. Lá við að þakið myndi rifna af myndveri fréttastofunnar þegar söngvarinn tók lagið.