„Í lok dagsins þá eru þetta þrjú stig fyrir okkur og það er það eina sem skiptir máli“

„Geggjað að ná í þrjú stig en kannski aðeins heppnir því þeir fengu þarna dauðafæri fannst mér en bara 1-0 sigur á heimavelli og dýrmæt þrjú stig fyrir okkur“ sagði Stefan Alexander Ljubicic framherji Keflavíkur eftir sigurinn.

„Við vorum flottir í fyrri hálfleik, náðum að spila og fengum góðar stöður en í seinni hálfleik átti ég þarna færi en eftir það ná þeir kannski aðeins að halda í boltann. Við vissum að þeir væru flinkir í því og kannski leyfum þeim að gera það“

„Í lok dagsins þá eru þetta bara þrjú stig fyrir okkur og það er það eina sem skiptir máli“

Keflavík átti öflugan fyrri hálfleik og hefði ekki verið ósanngjarnt ef munurinn hefði verið meiri í hálfleik.

„Já og nei. Við vorum að komast í fínar stöður en við þurfum kannski aðeins að vera meira beinskeyttir en að vera bara 1-0 yfir var alveg nóg og við náðum svo að halda því út“

Það var ekki mikill munur á liðunum endilega í dag en Keflavík skoraði þó markið sem skildi á milli.

„Helsti munurinn er að við náðum að skora eitt mark og þeir ekki. Þeir sýndu í seinni hálfleik og við sýndum í fyrri hálfleik en við náðum að klína inn markinu, það er svona munurinn“

Stefan Alexander Ljubicic skoraði eina mark leiksins eftir frábæra fyrirgjöf frá Eið Orra Ragnarssyni en þetta var ekki í fyrsta sinn sem þeir félagar tengja vel.

„Ég elska að spila með Eið og ég veit nákvæmlega hvenær hann gefur boltann þannig ég varð bara að planta mér þarna, hann fer held ég aðeins í varnarmann fyrst þannig hann fer yfir varnarmanninn sem var á mér. Ég næ að tímasetja þetta vel og skalla þetta inn“

Keflavík tengdi í fyrsta sinn í sumar tvo sigurleiki saman en þeir unnu góðan sigur á Þór í síðustu umferð.

„Fyrsta skipti sem að við náum að tengja og það er stórt að ná í sex stig í tveimur leikjum í röð. Við bara byggjum ofan á þetta, við eigum tvo úrslitaleiki eftir líka og við viljum vera þarna í topp sex“

Keflavík mætir FH í næstu umferð í Kaplakrika.

„Það er á grasi líka sem að er fínt. Við töpuðum síðast á móti þeim hér sem var ósanngjarnt en við erum bara vel stemndir og sérstaklega eftir að hafa tengt tvo sigra í röð þannig við erum bara fullir sjálfstrausts og ætlum að halda því áfram“ sagði Stefan Ljubicic.