Vaxtaákvörðunin hafi ekki verið rædd

Hörður Ægisson, ritstjóri Innherja, sagði í nýjasta þætti Þjóðmála frá því á föstudaginn að sést hefði til Þorgerðar á hádegisverðarfundi með Ásgeiri í húsakynnum Seðlabankans.

Peningastefnunefnd Seðlabanka Íslands ákvað á miðvikudag í síðustu viku að hækka stýrivexti um 0,25 prósentustig. Þeir eru nú 8 prósent.

„Ég frétti af því í síðustu viku, svona korteri í vaxtaákvörðunarfund peningastefnunefndar, að þá hefði Þorgerður Katrín utanríkisráðherra sést á hádegisverðarfundi með Seðlabankastjóra uppi í Seðlabanka.

Það sætir tíðindum að leiðtogar ríkisstjórnarinnar, sérstaklega utanríkisráðherra sem alla jafna hefur nú ekki mikið um málefni Seðlabankans að gera, séu að hitta seðlabankastjóra nokkrum dögum fyrir vaxtaákvörðunarfund,“ segir Hörður í Þjóðmálum.

Spyr sig hvort að ráðherrann treysti ekki sjálfstæði Seðlabankans

Að sögn Harðar sætir fundurinn sérstaklega tíðindum í ljósi þess að stundum hafi andað köldu milli Ásgeirs Jónssonar seðlabankastjóra og Viðreisnar.

Hann telji eðlilegt að spyrja sig þeirrar spurningar hvort utanríkisráðherra treysti ekki sjálfstæði Seðlabankans.

Hér má finna þátt Þjóðmála sem um ræðir:

Rætt er um fundinn um það bil frá mínútu 45 til 49.

„Hvort utanríkisráðherra hafi haft áhyggjur af því að seðlabankastjóri eða aðrir stjórnendur Seðlabankans myndu, á kynningarfundi Seðlabankans sem fór fram á miðvikudaginn, blanda sér með einhverjum hætti í umræðuna um þetta eldfima mál, kosninguna um að hefja á ný aðildarviðræður við ESB,“ segir Hörður.

Greinilega hafi einhverrar tortryggni gætt af hálfu Þorgerðar í garð Seðlabankans.

„Það væri alveg svona áhugavert að fá kannski einhverjar upplýsingar á borðið frá utanríkisráðherra,“ segir Hörður. 

Aðstoðarmaður Þorgerðar Katrínar utanríkisráðherra, Ingileif Friðriksdóttir, sagði í svari við fyrirspurn fréttastofu að Þorgerður, líkt og forverar hennar í starfi, hefði fundað með Seðlabankastjóra til þess að ræða stöðu heimsmála. 

Vaxtaákvörðun peningastefnunefndar hefði ekki verið rædd á fundi þeirra á dögunum. Ekki er nánar tilgreint hvað hafi farið fram þeirra á milli.