Ver­stappen skrifaði undir nýjan samning

Tíðindin bárust núna í morgun fyrir komandi keppnishelgi Formúlu 1 á heimavelli Verstappen í Hollandi en þetta verður í síðasta skipti í bili sem keppt verður á Zandvoort brautinni þar í landi í bili.

Mikið hefur verið rætt um framtíð Verstappen, sem er einn allra besti ökuþór Formúlu 1 mótaraðarinnar frá upphafi, upp á síðkastið og voru einhverjir sem gerðust svo djarfir að halda því fram að Verstappen væri að fá leið á Formúlu 1 og myndi brátt róa á önnur mið. 

Með því að skrifa undir þennan nýja samning við Red Bull til ársins 2030 hefur Verstappen hins vegar sýnt fram á vilja sinn að sækja í áttina að fleiri heimsmeistaratitlum næstu árin. 

Hollendingurinn var ekki parsáttur með þær stóru breytingar sem var farið í á regluverki mótaraðarinnar fyrir yfirstandandi tímabil. 

Verstappen verður 33 ára þegar að nýji samningur hans rennur sitt skeið árið 2030. 

„Ég er mjög ánægður með að hafa skrifað undir þessa framlengingu á mínum samningi. Við erum með besta fólkið í okkar liði og ég er spenntur fyrir því að halda samstarfinu áfram með það að markmiði að komast á toppinn í mótaröðinni á nýjan leik,“ segir Verstappen. 

Hann er sjötti í stigakeppni ökuþóra sem stendur og er 110 stigum á eftir forystusauðnum Kimi Antonelli, ökuþór Mercedes. 

„Ég hef alltaf sagt það. Red Bull Racing fjölskyldan er eins og mín önnur fjölskylda. Hér líður mér eins og heima hjá mér.“

Með þessum tíðindum þykir nokkuð ljóst að litlar sem engar breytingar verða á ökumannsskipan efstu liðanna í Formúlu 1 á næsta tímabili. Ferrari, Mercedes, McLaren og Red Bull Racing eru nær öll búin að ganga frá sínum málum hvað það varðar. 

Verstappen hefur verið ökuþór Red Bull samsteypunnar frá því að hann hóf sinn feril í Formúlu 1 árið 2014. Fyrst hjá systurliðinu Toro Rosso en seinna meir hjá Red Bull Racing þar sem að hann hefur slegið í gegn.

Hollendingurinn fór fyrir liðinu á frábæru tímabili þess frá árinu 2021 til 2024 þegar að Verstappen vann fjóra heimsmeistaratitla í röð. Hann er nú í sókn á eftir þeim fimmta.