Hlín opnaði markareikninginn hjá Malmö með tvennu

Malmö vann 6-0 sigur á heimakonum í Uppsala eftir að hafa skorað fimm mörk í fyrri hálfleiknum.

Hlín skoraði tvö mörk í þessum ótrúlega fyrri hálfleik, fyrsta mark liðsins á 3. mínútu og svo það fjórða með skalla á 38. mínútu.

Þetta voru fyrstu mörk Hlínar í sænsku deildinni síðan hún samdi við Malmö í sumarfríinu.

Älvali Lindström skoraði einnig tvö mörk en hin mörkin skoruðu þær Mia Persson (víti) og Ellen Löfqvist.

Hlín fór af velli á 52. mínútu en þetta var hennar þriðji leikur í sænsku deildinni og fimmti keppnisleikurinn síðan hún gekk til liðs við Malmö. Langþráð mörk hjá íslensku landsliðskonunni sem getur vonandi byggt ofan á þessa frammistöðu.

Malmö er í þriðja sæti deildarinnar en þó fjórtán stigum á eftir toppliði Häcken og níu stigum á eftir Hammarby sem er í öðru sætinu. Öll þrjú liðin eru með íslenskar landsliðskonur innan sinna raða.