Sturla Böðvars­son til KR

Sturla gerir árs samning í Vesturbæ, en hann er 18 ára gamall leikmaður sem hefur leikið allan sinn feril með uppeldisfélaginu Snæfelli í Stykkishólmi. Hann lék með liðinu í 1. deild á síðustu leiktíð þar sem hann skoraði 12,9 stig að meðaltali og tók 6,1 frákast.

Hann spilaði með U18 ára landsliði Íslands á Norðurlandamótinu og EM U18 í sumar.

„Ég er mjög ánægður að vera kominn í KR og hlakka mikið til komandi tímabils,“ er haft eftir Sturlu í yfirlýsingu KR. Þar ef haft eftir Jakobi Erni Sigurðarsyni, þjálfara liðsins:

„Sturla er mikið efni og átti gott sumar með U18 ára landsliði Íslands. Ég er mjög spenntur og ánægður að fá Sturlu í þær aðstæður og verkefni sem við erum með fyrir unga og góða leikmenn. Strákar eins og Friðrik og Lars hafa tekið hröðum og miklum framförum í KR/KV samstarfinu og ég hlakka mikið til að vinna með Sturlu að verða betri leikmaður og ná sínum markmiðum.“

Áður hefur KR fengið til liðs við sig Lettann Roberts Berzins og Svíann Adam Ramstedt um að leika með félaginu í Bónus-deild karla í vetur.

KR féll úr leik fyrir Stjörnunni í 8-liða úrslitum úrslitakeppninnar í vor.