Lífsnauðsynlegur sigur Júlíusar

Kristiansund hafði verið í tómu tjóni í deildinni fyrir leik dagsins, ekki unnið í síðustu sex leikjum og þar af tapað fimm. Ekki var búist við miklu af liðinu er Molde, sem er í baráttu um Evrópusæti í efri hluta deildarinnar, kom í heimsókn í dag.

Kristiansund var nýbúið að losa sig við Hrannar Snæ Magnússon, sem gekk í raðir Víkings á föstudaginn var, eftir að hafa mistekist að festa sig í sessi hjá norska liðinu.

Júlíus Mar hefur verið fastamaður í vörn norska liðsins og byrjaði að venju við hlið fyrirliðans Dan Peter Ulvestad í miðvarðarstöðunni. Þeir lokuðu nokkuð vel á Molde-liðið í dag og þá átti Bandaríkjamaðurinn Michael Lansing stórleik á bakvið þá í markinu.

Sander Hestetun Kilen kom liðinu yfir um miðjan fyrri hálfleik og Leander Alvheim skoraði síðara markið þegar tæpur stundarfjórðungur var eftir. Það fór aðeins um stuðningsmenn Kristiansund þegar Trent Koné-Doherty minnkaði muninn á 90. mínútu og Molde lá á heimamönnum í uppbótartímanum en leiknum lauk 2-1.

Kristiansund vinnur því fyrsta sigurinn í sjö leikjum og fer upp af fallsvæðinu, í 14. sæti, sem er umspilssæti um fall. Liðið er jafnt Sandefjord að stigum, sem er í 13. sæti, með 15 stig.

Álasund er með 14 stig í næst neðsta sætinu og Start á botninum með 10 stig.