Dómararnir á­stæðan fyrir því að ÍA vann ekki

Aðspurður um hvort ÍA hafi ekki átt að vinna leikinn segir Lárus:

„Jú, alveg 100 prósent. Ástæðan fyrir því að við unnum ekki þennan leik liggur hvorki hjá Víkingum né okkur,“ segir Lárus og er þá spurður hvað hann eigi við.

„Það var alveg augljóst að við áttum að fá víti. Böddi snerti boltann fyrst og svo tekur markmaðurinn hann út. Svo er það þannig að leikmenn ganga eins langt og dómarinn leyfir,“ segir Lárus Orri sem beinir sér þá að rauðu spjaldi sem Gísli Eyjólfsson fékk fyrir að reka höfuðið í Davíð Örn Atlason, leikmann Víkings.

„Dómararnir verða að fara að verða svolítið klókari. Davíð er klókur og ögrar Gísla og kallar fram viðbrögð frá honum. Það eina sem dómarinn á að gera er að labba að þeim og segja þeim að hætta þessu kjaftæði. Gefa báðum gult og málið dautt,“

„Ef dómarar leyfa leikmönnum að komast upp með þetta, að fiska leikmenn út af þá halda þeir því bara áfram. Ég álása þeim ekki fyrir að spila þennan leik vegna þess að þeir græða á þessu. Við vorum alveg með þá í þessari stöðu en hann nær að fiska leikmann okkar út af vegna þess að dómarinn fellur í gildruna,“ segir Lárus Orri.

Gísli verður nú líka að axla ábyrgð á því að hann bjóði hættunni heim með því að gera þetta. Ekki satt?

„Gísli gerir það. En Davíð hefði aldrei verið að þessi kjaftæði ef hann vissi að dómarinn myndi ekki falla í þessa gryfju. Gísli stangar hann ekki, þeir koma saman og hann hendur sér niður.“

Lárus Orri segist þá ánægður með sína menn sem hafi átt meira skilið úr leiknum.

„Ég var ánægður með mitt lið. Mér fannst þetta vera framhald af leiknum á móti Stjörnunni. Við vorum að mæta hörkugóðu liði sem sýndu okkur þá virðingu að mæta með alla sína helstu menn þó þeir séu í þessari miklu traffík. Þetta var hörkuleikur og ég er mjög ánægður með leikinn,“

Það er allt á uppleið eftir þessa fimm leikja taphrinu fyrir Stjörnuleikinn?

„Af hverju ert þú alltaf að tala um þessa fimm leikja taphrinu?“ spyr Lárus Orri á móti og hlær. En jánkar því svo að allt sé á uppleið hjá Skagamönnum.