Á enn hauka í horni: Marokkó og Katar lýsa yfir stuðningi við Infantino

Hugmyndir Infantinos um að stofna fjárfestingarfyrirtækið FFE (FIFA Forward Enterprise) til að halda utan um viðburði á vegum FIFA og selja tuttugu prósenta hlut þess til einkafjárfesta féllu í grýttan jarðveg.

Á föstudagskvöldið greindi Infantino svo frá því að hann hefði fallið frá hugmyndunum um einkafjárfestinguna.

Öll 55 aðildarríki UEFA, Knattspyrnusambands Evrópu, sammæltust um að sniðganga keppnir á vegum FIFA ef hugmyndir Infantinos næðu fram að ganga. Þetta var samþykkt einróma á neyðarfundi UEFA.

Þótt áætlanir Infantinos um að hleypa fjárfestum að innviðum FIFA hafi almennt mælst illa fyrir á hann enn nokkra hauka í horni.

Þar á meðal eru Katar og Marokkó. Katar hélt HM 2022 og HM eftir fjögur ár verður mótið haldið í Marokkó, á Spáni og í Portúgal.

Í yfirlýsingu segist katarska knattspyrnusambandið fagna því að Infantino hafi dregið tillöguna um stofnun FFE til baka en stendur enn við bakið á forsetanum umdeilda.

„Knattspyrnusamband Katar styður heilshugar áframhaldandi viðleitni Infantino forseta til að þróa og styrkja knattspyrnu á heimsvísu,“ segir í yfirlýsingu Katara.

Marokkóska knattspyrnusambandið hrósaði Infantino einnig fyrir að draga í land með hugmyndir sínar. Þrátt fyrir það segist forseti þess, Fouzi Lekjaa, enn vera bandamaður Infantinos.

„Við þetta tækifæri vill forseti marokkóska knattspyrnusambandsins ítreka stuðning sinn við forseta FIFA, Gianni Infantino, í öllum aðgerðum sem miða að því að þróa knattspyrnu á heimsvísu,“ segir Lekjaa.

Auk Katar hafa þrjú önnur Asíuríki lýst yfir stuðningi við Infantino: Kúveit, Sri Lanka og Líbanon. Þess má geta að eiginkona Infantinos, Leena Al Ashqar, er frá Líbanon og hann er fékk líbanskan ríkisborgararétt fyrr á þessu ári. Infantino er einnig með svissneskan og ítalskan ríkisborgararétt.