Gunn­laugur Árni tekur þátt í Ein­víginu á Nesinu

Gunnlaugur Árni hefur verið að gera afar flotta hluti með golfliði Louisana State-háskólans þar sem hann var útnefndur íþróttamaður ársins í karlaflokki. Það sem gerði þetta sumar sérstakt fyrir íslenskt golf var að hann vann sér fyrstu íslenskra karlkylfinga sæti á Opna bandaríska meistaramótinu í golfi.

Gunnlaugur Árni verður ekki eina stjarnan sem tekur þátt því venju samkvæmt munu nokkrir bestu kylfingar landsins etja kappi hver við annan. Þar á meðal verða GR-ingarnir Tómas Eiríksson Hjaltested og Dagbjartur Sigurbrandsson sem eru tveir síðustu sigurvegarar einvígsins. Aron Snær Júlíusson hefur einnig unnið einvígið áður og það taka því þrír fyrrum sigurvegarar þátt í ár.

Þrjár konur eru með í ár eða þær Guðrún Brá Björgvinsdóttir, Perla Sól Sigurbrandsdóttir og Ragnhildur Kristinsdóttir en kona hefur aðeins unnið einvígið þrisvar sinnum og það eru komin átta ár síðan Ragnhildur Sigurðardóttir vann 2018. Guðrún Brá (2025, 2ö20, 2ö19, 2018), Ragnhildur (2023) og Perla Sól (2022) hafa allar unnið Íslandsmótið í golfi á síðustu árum.

Að þessu sinni leika þeir í þágu Bergsins, sjálfstæðra, óhagnaðardrifinna samtaka sem veita ungu fólki gjaldfrjálsan stuðning vegna andlegrar líðanar og áskorana í daglegu lífi.

Markmið Bergsins er að veita svokallaða lágþröskuldaþjónustu þar sem áhersla er lögð á aðgengilegan stuðning, ráðgjöf og fræðslu á forsendum unga fólksins. Arion banki mun afhenda forsvarsaðila Bergsins ávísun upp á eina milljón króna í lok móts.

Einvígið hefst stundvíslega kl. eitt á mánudaginn. Fyrirkomulagið er með því sniði að sá fellur úr leik á fyrstu braut sem er fjærst holu eftir þrjú högg og tvö högg á annarri braut. Eftir það verður farið í hina hefðbundnu útsláttarkeppni, eða „shoot-out“, þar sem sá sem er með hæsta skor á viðkomandi braut fellur úr leik.