Guð­rún skoraði þegar Hammarby komst á topp deildarinnar

Það mætti segja að Hammarby hafi gjörsamlega valtað yfir Norrköping í sænsku úrvalsdeildinni í dag. Guðrún Arnardóttir var fyrst í liði Hammarby til að skora en hún gerði það strax á 6. mínútu leiksins.

Fanny Peterson og Inés Lorenius bættu svo við tveimur mörkum í viðbót og snemma í seinni hálfleik kom fjórða mark Hammarby. Eftir það róaðist leikurinn niður og urðu lokatölur leiksins 4-0 sigur fyrir Hammarby.

Þetta var mikilvægur sigur fyrir Hammarby þar sem liðið er sem stendur í efsta sæti deildarinnar með eins stigs forskot á Hacken í öðru sætinu sem er með Thelmu Kareni Pálmadóttur innanborðs. Hacken á þó leik til góða og getur endurheimt toppsæti deildarinnar.

Norrköping er sem stendur í tólfta sæti sem er umspilssæti um að halda sér áfram í úrvalsdeildinni. Rosengard er í sætinu fyrir ofan sem tryggir áframhaldandi sæti í úrvalsdeildinni. Rosengard og Norrköpng eru jöfn að stigum en bæði á Rosengard leik til góða og Norrköping er með mun verri markatölu.