Féll í yfir­lið í miðjum leik

Cameron Menzies vann Luke Humphries í fyrstu umferð World Matchplay-mótsins í pílukasti í gær. Hann vann leikinn 10-7 og lokaði síðasta leggnum með 170. Það er mesta sem hægt er að skjóta út og kallast það „stóri fiskurinn“.

Í kvöld keppti hann gegn Ross Smith í annarri umferð mótsins. Búið var að leika þrjá leggi og var Menzies yfir 2-1 þegar hann byrjaði að vera ringlaður á sviðinu. Mótherji hans og dómarar leiksins komu honum til aðstoðar og var hann tekinn baksviðs.

Þar leið yfir Menzies og var farið með hann til aðhlynningar og var svo færður á hótelið sitt til að jafna sig. Hann gat ekki haldið áfram keppni og þurfti því að gefa leikinn gegn Smith.

Alþjóða pílukastsambandið deildi upplýsingum um að Menzies hefði jafnað sig og að það væri í lagi með hann. Hann gæti þó ekki haldið áfram keppni á mótinu.

Menzies hefur áður vakið athygli á sviðinu en hann blóðgaði sig eftir að hafa dottið úr heimsmeistaramótinu í pílukasti. Hann barði borð og fékk skurð á hendina auk þess sem hann stakk hendinni sinni í flugelda sem var á sviðinu. Hann baðst svo afsökunar á hegðun sinni.