Önnum kafinn Arnór óskar Bene­dikt góðs bata

Leikjaálagið verður mikið í vetur hjá TTH Holstebro, sem tekur þátt í Evrópukeppni í fyrsta sinn síðan árið 2014. Liðið dróst í morgun í riðil með Benfica frá Portúgal, Karviná frá Tékklandi og Torrelavega frá Spáni í Evrópudeildinni.

„Það verða margir leikir og ekki svo margar æfingar, þannig að það er mikilvægt að við nýtum tímann vel núna á, þegar við höfum meiri tíma til að vinna í hlutunum,“ sagði Arnór Atlason við Avisen í morgun eftir fyrstu æfingu liðsins á undirbúningstímabilinu.

Benedikt Gunnar Óskarsson, nýr leikmaður liðsins, lenti í alvarlegum meiðslum meðan hann var í sumarfríi hér á Íslandi. Benedikt fékk golfkúlu í höfuðið og missti hreyfigetu í hægri höndinni, eins og kom fram í viðtali hans við Vísi í gær.

„Í augnablikinu er einbeiting okkar bara á að Benedikt nái fullum bata. Hann er í góðum höndum á Íslandi og er hægt og rólega að taka líkamlegum framförum. Tilfinningin í hendinni er að verða betri og betri. Endurhæfing er í fullum gangi og hann fær meðferð þrisvar í viku. Við fylgjumst náið með framvindunni og vonum það besta fyrir Benedikt,“ sagði Arnór.

Auk Benedikts er bakvörðurinn Thomas Damgaard að glíma við meiðsli.

„Í sókninni verðum við líka án Thomas Damgaard í byrjun tímabilsins og þess vegna verðum við, meðal annars, að koma Thomas Houtepen betur inn í hlutina,“ sagði Arnór en var sáttur með fyrstu æfingu liðsins.

„Strákarnir komu í góðu skapi og í góðu standi, þannig að ég fer ekki með slæma tilfinningu í háttinn eftir fyrstu æfinguna. Það er alltaf gaman að koma aftur í höllina, sjá nýju strákana á gólfinu og hitta hóp sem manni þykir vænt um að vera með eftir að hafa verið í sundur í mánuð,“ sagði Arnór.