Ragn­hildur hlaut hálfa milljón í þriðja sæti í Eng­landi

Ragnhildur varð í fyrra fyrst Íslendinga til að vinna mót á LET Access, sem er næststerkasta mótaröð Evrópu, og GR-ingurinn komst ansi nálægt því að vinna aftur mót í dag.

Hún deildi nefnilega toppsætinu fyrir lokahringinn, eftir að hafa spilað á 65 höggum í gær eða sjö höggum undir pari.

Ragnhildur náði sér hins vegar ekki eins vel á strik í dag. Hún fékk þó þrjá fugla en einnig tvo skolla og skramba á 5. holu, og lék því hringinn á +1 höggi.

Ragnhildur endaði því í 3.-7. sæti á samtals -9 höggum eftir hringina þrjá, og hlaut 3.320 evrur fyrir eða tæplega hálfa milljón króna.

Hin tékkneska Tereza Kozeluhova vann mótið, sitt fyrsta á fimm árum á mótaröðinni, og hlaut 12.800 evrur fyrir. Hún lék á -12 höggum en Hyenonji Kang frá Sameinuðu arabísku furstadæmunum varð í 2. sæti á -11 höggum.

Andrea Bergsdóttir lék samtals á -5 höggum og varð jöfn í 12. sæti og Hulda Clara Gestsdóttir, sem vann mót í Tékklandi fyrir skömmu, lék samtals á -1 höggi og endaði jöfn í 33. sæti.

Hulda Clara er efst Íslendinganna á stigalista mótaraðarinnar, nú í 4. sæti, en Ragnhildur er komin upp í 8. sæti og Andrea er í 24. sæti.