„Hag­ræðingar” í Reykja­nes­bæ

Tveimur mánuðum eftir kosningar leggur Sjálfstæðisflokkurinn fyrir bæjarráð Reykjanesbæjar málið „úttekt á fjármálum og stjórnsýslu Reykjanesbæjar“. Þar hefur nýr meirihluti fundið út hvernig best sé að ná fram hagræðingu, með því að ráða inn fjóra ráðgjafa bæjarstjóra. Aðstoðarmann bæjarstjóra, verkefnastjóra hagræðingaaðgerða, ráðgjafa í hagræðingarteymi ásamt því að auka við stöðu formanns bæjarráðs sem fær launahækkun upp í 50% af þingfararkaupi. Umræddur formaður verður á hærri launum en formaður bæjarráðs í Kópavogi og í Hafnarfirði.

Í stað þess að nýta fyrrum bæjarstjóra sem er á biðlaunum hjá sveitarfélaginu hefur verið ráðinn til starfa, í 10 mánuði, annar bæjarstjóri til aðstoðar. Reykjanesbær mun því til áramóta greiða þremur bæjarstjórum laun og svo tveimur frá janúar til og með apríl. Launakostnaður bara við þessa aðgerð verður um 10 milljónir á mánuði út árið 2026 en auðvitað allt í nafni hagðræðingar. Til að setja hlutina í samhengi þá var Haraldur Líndal ráðgefandi við gerð Sóknarinnar árið 2014 í tæpa þrjá mánuði en það var endurreisn sveitarfélags sem var þá í verulegum fjárhagsvanda.

Báknið sem umræddir menn ræddu ítrekað um í aðdraganda kosninganna virðist vera að blása út, en í nafni hagræðingar.

Allt í boði Sjálfstæðisflokksins í Reykjanesbæ og greitt af okkur íbúum en auðvitað mikilvægt að ná fram hagræðinu hjá sveitarfélagi sem hefur verið í þéttri endurreisn reksturs og fjármála undanfarinn áratug.

Höfundar eru Guðný Birna Guðmundsdóttir, bæjarfulltrúi Samfylkingarinnar, og Halldóra Fríða Þorvaldsdóttir, bæjarfulltrúi Framsóknarflokksins.