Níu í lífs­hættu og einn látinn eftir lestar­slys í Eng­landi

Lestarstjóri annarrar lestarinnar lést við áreksturinn og eitt hundrað manns slösuðust. Þar af töldust fimmtíu og sjö bera minniháttar áverka. Slysið kallaði á gífurlegan viðbúnað viðbragðsaðila, þar á meðal sex sjúkraþyrlur og tuttugu sjúkrabíla.

Samkvæmt fréttaflutningi BBC keyrði önnur lestin aftan á hina. Önnur lestin lagði af stað frá Notthingham en hin frá bænum Corby. Lestarnar voru komnar um það bil miðja vegu áleiðis til Lundúna þegar slysið varð.

Farþegar lestanna lýsa því að slysið hafi átt sér stað mjög skyndilega en samkvæmt þeim var fremri lestin kyrrstæð. Maður sem staddur var í lestarvagni nærri árekstrinum lýsti því að ranka við sér og sjá blóð, reyk og brotna útlimi. Annar lýsti því að hann hefði verið einn þriggja farþega í sínum vagni sem ekki höfðu slasast. 

Yfirvöld hafa beðið almenning að halda ró sinni og hlaupa ekki að ályktunum varðandi tildrög slyssins heldur bíða þess að full rannsókn sérfræðinga fari fram.