Sigldu af stað með mótmælandann um borð

Hann sagðist þá ekki vita hvað annað hann gæti gert til að mótmæla hvalveiðum.

Í samtali við fréttastofuna fyrr í dag sagðist Hólmsteinn ekki ætla sjálfviljugur niður því það væri erfitt að taka menn úr tunnunni. Hann segist ekki vita hvenær hann færi loks niður eða við hvaða aðstæður. Hólmsteinn skipulagði mótmælin einn.

„Ég bara veit ekki hvað annað ég get gert. Lögreglan kom og fór áðan. Nokkrir úr áhöfninni töluðu við mig,“ sagði Hólmsteinn í samtali við Vísi fyrr í dag en hann hafði einnig orð á því að hann ef að skipið færi, þá færi hann einnig.

„Þetta mun ekki stoppa þetta skip, þegar ég fer þá fer skipið. En ég veit ekki hvað annað ég get gert til að hjálpa hvölunum, sumir gera þetta, aðrir skrifa, aðrir tala. Það er fallegt að allir geri það sem þeir geta.“

Hvalur 8 sigldi fyrr í dag upp í Hvalfjörð og líklegt þykir að Hvalur 9 geri það sömuleiðis þar sem hvalabyssur yrðu settar á það og skipverjar myndu þjálfa sig í notkun þeirra. Ætti skipið að halda út á mið til hvalveiða um næstu helgi, líklegast á laugardag, þann 20. júní. Báturinn virtist á fimmta tímanum vera á góðri siglingu í átt frá höfninni.

Ásmundur Rúnar Gylfason aðstoðaryfirlögregluþjónn sagði í samtali við Vísi fyrr í dag að ekki hefði verið óskað eftir aðkomu lögreglu að mótmælunum.

„Við fórum, ræddum við þá sem málið snýr að og það var ekki óskað eftir aðkomu lögreglu að þessu,“ sagði hann í samtali við blaðamann.

Hafi verið skráður sem farþegi

Vala Árnadóttir, formaður Hvalavina, gaf fréttastofu leyfi til að heyra símtal milli hennar og Hólmsteins, sem heyra má í myndskeiðinu hér að neðan. Tekið skal fram að hún er ekki fréttamaður Sýnar þrátt fyrir að hún haldi á hljóðnema merktum fréttastofunni í myndskeiðinu.

Í símtalinu kom fram að hann hefði verið skráður sem farþegi í skipinu. Hann sagði að starsfmenn í bátnum hafi tekið niður hjá honum kennitölu og nafn en hann hafi ekki skilið hvers vegna.

„Þeir sögðust ætla að skrá mig sem eitthvað sem ég skildi ekki og gaf þeim nafn og kennitölu og símanúmer og svo framvegis.“

Fréttin hefur verið uppfærð.