Eld­haf gaus upp í vélar­rúmi og skipið rak í þrjá tíma

Færeyska björgunarmiðstöðin í Þórshöfn staðfestir í samtali við Vísi að þeim hafi borist neyðarkall frá Barða skömmu fyrir klukkan þrjú í dag. Þá hafði, samkvæmt heimildum fréttastofu, orðið sprenging í vélarrúmi bátsins og mikill eldur kviknaði. Skipið var þá statt um 15 sjómílum norðan af Færeyjum.

Björgunarskipin Brimil og Vón av Eiði voru send til aðstoðar en upp úr klukkan þrjú bárust boð um að áhöfninni hefði tekist að slökkva eldinn og að allir væru heilir á húfi um borð.

Brimil er með Barð í eftirdragi og áætlað er að þau komi til hafnar í Þórshöfn í fyrramálið. Íslensku landhelgisgæslunni hefur verið gert viðvart.

Gunnþór Ingvason framkvæmdastjóri Síldarvinnslunnar segist ekki hafa vit á því hversu mikið tjón hafi hlotist af eldinum. Það verði að koma í ljós um helgina.

„Aðalmálið er að áhöfnin hafi bjargast. Menn eru þjálfaðir og kunna að bregðast við,“ segir hann.