Hundruðum sagt upp í maí

Alls var 270 starfsmönnum sagt upp í gistiþjónustu en um er að ræða hópuppsögn Iceland Hotel Collection by Berjaya. Uppsagnirnar voru liður í tilfærslu hótelanna Hilton Nordica og Natura yfir til Íslandshótela. Davíð Torfi Ólafsson, forstjóri Íslandshótela, sagði í kjölfar uppsagnanna að hann gerði ráð fyrir því að ráða allt fólkið aftur til starfa.

„Auk þess var 26 starfsmönnum tengt ferðaþjónustu sagt upp störfum, 37 starfsmönnum í sjávarútvegi og 37 í fjármálastarfsemi,“ segir í fréttatilkynningu Vinnumálastofnunar.

37 starfsmönnum Rapyd á Íslandi var sagt upp. Þar á gervigreindin að leysa af hólmi fjölda starfsmanna, miðað við bréf Arik Shtilman, forstjóra Rapyd á heimsvísu.,

Vinnumálastofnun bárust engar upplýsingar um hópuppsagnir í apríl en þrjár í mars þar sem níutíu var sagt upp störfum.

Fréttin hefur verið uppfærð. Fyrst var vísað í uppsagnir hjá Bláa lóninu sem reyndist ekki vera hópuppsögn.