Hefur „nær engar á­hyggjur“ af eldsneytisskorti

Forstjórinn segir að Ryanair, sem er líklega eitt þekktasta lággjaldaflugfélag heims, hafi fundið út úr vandanum og tryggt sér nægar eldsneytisbirgðir, að því er fram kemur í breska blaðinu Guardian. Líkt og flestir vita hafa lokanir Írana á Hormússundi haft afdrifaríkar afleiðingar í för með sér fyrir heimsmarkaðsverð á olíu sem og fyrir eldsneytisbirgðastöðu.

Þakkar Noregi, Afríku og Ameríku

„Það voru uppi alvöru áhyggjuraddir um þessi mál í Evrópu fyrir tveimur mánuðum síðan. Við höfum núna nær engar áhyggjur af eldsneytisbirgðum í Evrópu. Áskorunin felst í flugfargjöldunum,“ segir O'Leary. Hann segir flugfélagið eiga nóg af birgðum og þakkar það kaupum á eldsneyti frá vesturhluta Afríku, Noregi og Ameríku.

Forstjórinn segist ekki eiga von á því að átökin í Íran haldi áfram né að Hormússundi verði áfram lokað á næsta ári. Muni það gerast muni það haga geigvænleg áhrif í för með sér fyrir evrópsk lággjaldaflugfélög.

„Ef þetta heldur áfram næstu tólf mánuði þá munu flugfélög liggja í valnum í Evropu í vetur,“ segir forstjórinn. Guardian hefur eftir Neil Sorahan fjármálastjóra Ryanair að félagið sé bjartsýnt á sumarið. Eftirspurn sé mikil en fólk bíði frekar með að bóka flugmiða sína á þessum óvissutímum.

„Þannig að við höfum ekki sömu yfirsýn yfir stöðuna og allajafna á milli júlí og september. Bókunarstaða á flugmiðum flugferða sem stutt er í er sterk en ef fólk bíður of lengi getur það þurft að sætta sig við hærri fargjöld.“