Ung­verja­grýlunni hent út en gæti enn fengið boð á ballið

Jónas Elíasson og Anton Gylfi Pálsson dæmdu sannkallaðan spennutrylli í Veszprém í gærkvöld þar sem Ungverjar unnu 31-30 gegn Serbum en töpuðu umspilseinvígi liðanna samtals með eins marks mun, 61-60.

Útlit var fyrir að úrslitin myndu ráðast í vítakeppni en Ungverjum mistókst að nýta 27 sekúndna lokasókn sína og féllu því úr leik.

Það gerðu líka Hollendingar sem töpuðu samtals 67-60 fyrir Grikkjum, og Austurríkismenn sem töpuðu samtals 56-55 fyrir Pólverjum.

Færeyingar komu sér á HM í fyrsta sinn með því að slá út Bosníumenn og vinna einvígið 57-50 samanlagt, Slóvenía vann Svartfjallaland samtals 60-57 og Ítalir slógu út Svisslendinga með 67-63 sigri í þeirra einvígi.

Alls unnu tíu Evrópuþjóðir sig inn á HM í gegnum umspil um helgina en áður höfðu sex Evrópuþjóðir, þar á meðal Íslendingar, tryggt sig inn á mótið með árangri á EM í janúar eða sem gestgjafar (Þýskaland) eða ríkjandi heimsmeistarar (Danmörk).

Sterk rök Ungverja fyrir boðsæti

Nú hafa 30 af 32 sætum á HM verið fyllt en það er að venju í höndum IHF, alþjóða handknattleikssambandsins, að velja síðustu tvær þjóðirnar inn á mótið. Síðast urðu Bandaríkin og Sviss fyrir valinu.

Ungverjar gera sér vonir um að fá annað boðsætanna (e. wild card) sem í boði eru og það eykur líkur þeirra að Bandaríkin skuli þegar hafa unnið sig inn á mótið. Bandaríkjamenn verða gestgjafar næstu Ólympíuleika og hefðu því vafalítið fengið boð á HM hefðu þeir þurft þess.

Ungverjar gera ansi sterkt tilkall til þess að fá boðsæti því þeir hafa endað í hópi átta efstu þjóða á HM í síðustu þrjú skipti. Aðeins þrjár aðrar þjóðir geta státað sig af því.

Ungverjar voru líka bara einu marki frá því að komast á HM, eins og reyndar Austurríkismenn. Þá hafa Ungverjar aldrei fengið boðsæti áður og þeir verða líka gestgjafar HM kvenna á næsta ári sem ætti að hvetja IHF til að halda sambandinu góðu við þá.

Það gæti því enn vel farið svo að Ísland mæti Ungverjalandi á HM í janúar á næsta ári en þá er vert að hafa í huga að strákarnir okkar lækkuðu rostann í „Ungverjagrýlunni“ með 24-23 sigri á EM í janúar síðastliðnum. Þar endaði Ísland í 4. sæti en Ungverjaland í því tíunda.

Dregið verður í riðla fyrir HM þann 10. júní.