44 hringir ekki nóg fyrir sigur­vegarann: „Hefði viljað reyna við brautarmetið“

210 hlupu af stað klukkan níu á laugardagsmorgun og lauk keppninni rétt fyrir klukkan fimm á mánudagsmorgun. Í öðru sæti var Guðmundur Lúther Hallgrímsson sem fór af stað í 44. hringinn en sneri við.

„Ég hefði viljað halda áfram,“ segir Þórdís í samtali við Tinnu Miljevic í útsendingu Vísis frá Öskjuhlíð í morgunsárið. Hún kom í mark rétt fyrir klukkan fimm í morgun hafandi hlaupið sleitulaust frá því klukkan níu á laugardagsmorgun.

Segja má að ekki hafi verið sjáanlegt á Ólöfu að hún hafi verið á hlaupum í tæpa tvo sólarhringa. Hún hljóp í 44 klukkustundir og fór á þeim 294,8 kílómetra.

Bakgarðshlaupið stendur þar til einn stendur uppi sem sigurvegari en þar sem aðrir höfðu helst úr lestinni, síðast áðurnefndur Guðmundur Lúther, gat Þórdís ekki haldið áfram þar sem hún stóð ein eftir.

„Ég hefði viljað reyna við brautarmetið,“ segir Þórdís. Það met er 57 hringir, og hefði þýtt 13 klukkustundir í viðbót á hlaupum – til klukkan 18:00 síðdegis í dag.

Fyrst og fremst er Þórdís þó glöð og fegin að fagna sigri.

„Loksins. Ég er búin að vera á palli þrisvar í röð og aldrei unnið,“ segir Þórdís Ólöf.

Viðtalið má sjá í spilaranum.