Valverde á spítala eftir önnur slags­mál við Tchouameni

Leikmönnunum lenti saman á æfingu í gær en hvorugur þeirra hlaut áverka eftir þau áflog. Í dag stigmögnuðust stimpingarnar verulega.

Samkvæmt heimildum Marca hófst þetta í morgun þegar Valverde neitaði að taka í höndina á Tchouameni þegar þeir mættu á æfingu.

Þeir rifust harkalega aðeins áður en æfingin hófst. Svo tók Valverde sig til, í nokkur skipti, og tæklaði Tchouameni til jarðar. Frakkinn fékk á endanum nóg og brjálaðist út í Úrúgvæjann.

Nokkrum mínútum síðar varð rifrildið að ofbeldi inni í búningsherbergi. Valverde hrasaði við og lenti á borði í búningsherberginu.

Valverde var fluttur á spítala í heilahristingsskoðun en er kominn heim til sín.

Eftir atvikið er framkvæmdastjóri Real Madrid sagður hafa haldið neyðarfund með leikmönnum. Þetta er, eins og áður segir, ekki í fyrsta sinn sem áflog brjótast út á æfingasvæðinu. Meira má lesa um það hér.

Óvíst er hvað afleiðingum Valverde og Tchouameni munu mæta en Real Madrid mætir Barcelona á Nývangi á sunnudag. Barcelona verður spænskur meistari með sigri eða jafntefli í þeim leik.