Tryggja rekstur Hjálparsímans til tveggja ára

Alma D. Möller heilbrigðisráðherra, Ragnar Þór Ingólfsson, félags- og húsnæðismálaráðherra, og Inga Sæland, mennta- og barnamálaráðherra, undirrituðu í dag tveggja ára samning við Rauða krossinn á Íslandi um fjármögnun Hjálparsímans 1717.

„Við fögnum þessum mikilvæga stuðningi sem gerir okkur kleift að mæta vaxandi þörf fyrir þjónustu Hjálparsímans af auknum krafti,“ segir Ingibjörg Elín Halldórsdóttir, framkvæmdastjóri Rauða krossins, sem ritaði undir samninginn fyrir hönd félagsins, í tilkynningu. 

Hún segir að með þessum samningi skapist fyrirsjáanleiki sem skipti lykilmáli þegar komi að því að efla og bæta þjónustuna.

„Samtölin eru að þyngjast og fleiri hafa samband vegna sjálfsvígshugsana,“ segir Ingibjörg. „Einnig lýsa fleiri ungmenni áreitni og hótunum sem þau verða fyrir á netinu. Til að bregðast við þessu ætlum við að stórauka fræðslu til starfsfólks og sjálfboðaliða. Þannig færum við þeim enn betri verkfæri til að veita öllum sem leita til Hjálparsímans nauðsynlegan stuðning.“

Samfélagslegt öryggisnet

Ráðherrarnir þrír leggja áherslu í tilkynningu á að Hjálparsíminn 1717 sé mikilvægur hluti af samfélagslegu öryggisneti. Með sameiginlegri aðkomu ráðuneytanna sé undirstrikað að sálfélagslegur stuðningur snertir mörg svið samfélagsins: heilbrigði, velferð, húsnæðisöryggi, börn, ungmenni og fjölskyldur.

„Við erum afar þakklát Rauða krossinum fyrir að sinna þessari mikilvægu starfsemi. Ég veit af þessum aukna þunga í samtölunum. Það er áhyggjuefni. En á sama tíma er það ánægjuefni að fólk leiti sér hjálpar og að það treysti Hjálparsímanum fyrir erfiðleikum sínum og líðan,“ sagði Alma Möller eftir að hafa undirritað samninginn.

Sjö þúsund símtöl á árinu

Á síðasta ári bárust rúmlega 20 þúsund samtöl til Hjálparsímans. Það sem af er árinu 2026 hafa tæplega 7.000 samtöl borist þjónustunni. Þar af hafa 533 samtöl snúið að sjálfsvígshugsunum og 546 að ofbeldi. Í 66 tilvikum hefur þurft að hafa samband við 112 vegna alvarleika máls.

Árið 2025 var 1.728 sinnum haft samband við 1717 vegna sjálfsvígshugsana sem er oftar en nokkru sinni áður. Í 229 tilvikum höfðu sjálfboðaliðar og starfsfólk 1717 samband við Neyðarlínuna og óskuðu eftir sjúkrabíl vegna alvarleika samtalanna.

Hjálparsíminn 1717 er opinn allan sólarhringinn, bæði í síma og netspjalli. Þar veita sérþjálfaðir sjálfboðaliðar og starfsfólk Rauða krossins virka hlustun, sálrænan stuðning og upplýsingar um úrræði sem standa fólki til boða.