Haukur allt í öllu hjá Löwen

Löwen náði forystunni snemma gegn Melsungen í dag og skemmst er frá því að segja að forystuna lét liðið aldrei af hendi. Liðið bætti raunar við hana jafnt og þétt allan leikinn og honum lauk með átta marka sigri, 30-22.

Haukur Þrastarson hefur verið í fínu formi síðustu vikur og ekkert lát var á í dag. Hann skoraði átta mörk úr tíu skotum og lagði upp fimm að auki og kom þar með að langflestum mörkum allra á vellinum í dag.

Í liði Melsungen var Reynir Þór Stefánsson með fjögur mörk úr sex skotum og Arnar Freyr Arnarsson skoraði úr báðum skotum sínum af línunni.

Löwen nálgast Melsungen í töflunni þökk sé sigri dagsins. Ljónin eru með 33 stig í áttunda sæti, stigi á eftir Melsungen sem er með 34 stig sæti ofar.

Bæði lið hafa leikið 30 leiki af 34 umferðum deildarinnar.