Höfnum fram­tíðinni sem aldrei kom

Reykvíkingum hefur um árabil verið seld sú hugmynd að allt verði betra í framtíðinni. Ef bara fólk hefur þolinmæði til að bíða eftir borgarlínu, lausn á biðlistavanda leikskólanna eða hinni ofurþéttu framtíðarborg þar sem bílar verða allt að því óþarfir.

Gott og vel að hafa framtíðarsýn. En sýnin ein og sér er gagnslaus ef geta eða staðfesta til að fylgja henni eftir er engin. Framtíðin er núna,

Sjálfstæðisflokkurinn í Reykjavík vill breyta þessu. Til framtíðar viljum við bættar samgöngur, fjölbreyttari lausnir í leikskólamálum, sjálfbæran rekstur og kraftmeiri húsnæðisuppbyggingu. Allt eru þetta hins vegar verkefni sem taka tíma og því nauðsynlegt að einblína á aðgerðir sem hægt er að ráðast í strax.

Gallinn er nefnilega sá að biðlund fólks er á þrotum og framtíð Samfylkingarinnar hefur aldrei komið.

Borgarlína hefur verið á teikniborðinu í fimmtán ár, en er enn ófjármögnuð og þær hugmyndir sem settar hafa verið fram um einstaka verkliði – svo sem Suðurlandsbraut – hafa fallið í grýttan jarðveg. Borgarlína Samfylkingarinnar er komin út í skurð og á meðan situr fólk fast í umferðinni.

Sama má segja um leikskólana. Fyrir hverjar kosningar er því lofað að biðlistunum verði nú loksins útrýmt! Samt eru hátt í þúsund börn á biðlista á hverju hausti.

Ekki í bæklingi Samfylkingarinnar

Þéttingarstefnan er sömuleiðis komin á endastöð. Birtingarmyndirnar eru margar. Fólki líkar hvorki hönnun, né ljósvist þeirra steypuklumpahverfa sem risið hafa í borginni. Sumir hafa meira að segja vaknað einn morguninn með grænan vegg fyrir utan stofugluggann. Það var ekki í bæklingi Samfylkingarinnar.

Á meðan blæs borgarkerfið út og stjórnlyndið læðist að æ fleiri þáttum hins mannlega samfélags. Ekkert er borginni óviðkomandi. Fánum hinna ýmsu þjóðríkja er flaggað við Ráðhúsið og borgarstarfsmenn senda íbúunum tilmæli um hvernig skuli halda barnaafmæli, eða hvort bjóða eigi upp á pylsur hjá hinum fjölmörgu stofnunum borgarinnar. Borgin eyðir tíma og fjármunum í verkefni sem eiga alls ekki að vera í hennar verkahring.

Ryðjum aðskotahlutum úr bílastæðum strax

Sjálfstæðismenn ætla að færa borgina aftur í áttina að sínu kjarnahlutverki. Við ætlum strax að hefja innleiðingu fjölbreyttra lausna í leikskólamálunum. Samgöngusáttmálann þarf að endurskoða strax og semja betur fyrir Reykjavík. Óþarfa hindrunum í umferð og aðskotahlutum úr bílastæðum á að ryðja strax úr vegi. Leggja á niður óþarfa ráð og nefndir og fækka millistjórnendum.

Í kosningunum 16. maí getur fólk hafnað framtíðinni sem aldrei kom og kosið nýja Reykjavík. Borg þar sem einblínt er á lausnir sem hægt er að innleiða strax, svo einfalda megi hversdag borgarbúa. Um leið munum við leggja traustan grunn að sterkari, frjálsari og betur rekinni borg til framtíðar. Reykjavík þar sem fjölskyldur njóta betri þjónustu, atvinnulífið býr við hagstæðari skilyrði og skattfé íbúanna er nýtt af ábyrgð og skynsemi.

Höfundur skipar 2. sæti á lista Sjálfstæðisflokksins í Reykjavík.