Bellerín braut hjörtu Madrídinga

Brassinn Vinicius Junior kom Real Madrid yfir eftir rúmlega stundarfjórðungsleik og 1-0 stóð nánast allt til loka. Það stefndi í sigur gestanna þar til Hector Bellerín, fyrrverandi leikmaður Arsenal, skoraði jöfnunarmark í blálok uppbótartíma og allt ætlaði um koll að keyra á Benito Villamarín-leikvanginum.

Betis heldur í veika von um Meistaradeildarsæti en liðið er með 50 stig í fimmta sæti, sjö stigum frá Atlético Madrid sem er í fjórða sætinu. Celta Vigo og Getafe koma næst á eftir Betis með 44 stig hvort í baráttunni um Evrópudeildarsæti.

Jafnteflið gerir nánast út um álíka veika von Real Madrid um spænska meistaratitilinn. Barcelona er með nokkuð þægilega forystu á toppi deildarinnar. Eftir jafntefli kvöldsins er Real Madrid með 74 stig í öðru sætinu, átta stigum frá Börsungum sem eiga leik inni þegar fimm umferðir eru eftir.